3x Bangkok

halloechen
scho zum 3te mau si mir its i dere grosse chaotestadt bangkok.e super usflug wo me vo hie us cha mache, isch dr 100 km entfaernt floauting market. bi daem market, wo sech dr verchouf uf em ne fluss uf de booetli abspiut, het me vorauem am morge frueh es bsungers ambiente. wo no nid viu touris ume si u die iheimische no mitenang am haendele si, si mir 2 mit em ne schiffli derduer gfahr. dae maerit isch aecht empfaehlens waert u gseht me aeue so schnaeu nuemm meh.
am wuchenaend si mir zum mutter aller maerite gange. dr groescht maerit vo bangkok namens chatuchak. nach eim tag hesch villech grad mau e 1/4 gseh vo auem. naebscht tonne vo diverse chleider, souveniers, deckostueck, moebu cha me ou aui arte vo tier choufe. die arme waese si de meischtens ou no im ne chleidli oder hei chaeppli ufgsetzt.
da die stadt so witloeifig isch, mues me meischtens es taxi naeh u steit ewigs im stou. vo de tuktuk rate mir ab, die cheibe houe eim immer ueber ds ohr. vorauem ar khao san road, dere tourischtestrass vo bangkok, warte si numme uf ihri opfer.
ei tag si mir ir 2 groeschte snake farm vor waeut gsi. naebscht daem das mir e pyton hei ume haus gha, hei mer sehr viu ueber schlange glehr u wuesse its am schluss vou uesere reis ou, wie me bim ne schlangebiss richtig wuerd reagiere. (isch ja sehr wichtig, jetz wo mir id schwiz zruegg chehre) ihre show reize si de no die verschidene schlangearte u ues ir erschte reihe isch langsam nuemm so wouh gsi. so ne king kobra isch ja scho schoen, aber bitte nid vor uesne schinkli.
its hei mir no chlei meh aus 1 tag i dere stadt, bevor mir hei fluege. mir si scho fasch chlei naervoes, we mr dra daenke. im mbk-shoppingcenter wei mir ues drum no chlei go ablaenke.
auso, es letsch mau tschuess us em ne angere land.
auerliebschti gruess vo de 2 schoeggeler

Bali-Teil 3

hallo zaeme
wie scho im letschte blog erwaehnt, si mir in bali mit em pinkige honda umenang gflitzet. zersch si mir quer duer ds land ueber die voukaen uebere uf d nordsite vo bali. drbi hets ues i de baerge verschiffet vom struebschte. richtegi bech si ueber d strasse abe gflosse, was d fahrt bi dene eher schwierige, kurvige u starch befahrnige strasse nid umbedingt erliechteret het.
ds ziu isch lovina gsi, es eher ruhigs u chlises fischerdoerfli mit em ne schwarze sandstrand. dert isches viu weniger touristisch u mi gseht no chlei meh dr traditionell laebesstiu vo de indonesier. mehrmaus hei si d strasse waege ihrne rituelle umzueg gsperrt u mir hei daem gscheh choenne zuegluege. derbi waerde die umzueg vo klimbernder musig begleitet, u d roeicherstaebli si meischtens ou nid wit waeg.
jede morge due d indonesier opfergabe a de gfaehrleche steue verteile. derbi wei si die boese geschter mit em rouch vo de staebli vertriebe u die guete geischter wecke. die *choerbli* liege meischtens a de unmueglechschte steue, wo mir tourischte doch immerwieder dristogle.
ueberau wo in bali haerefahrsch, gsehsch die wunderschoene risterasse. irgendwie isch das eim vorhaer gar nid bewusst gsi, dass da so viu herti handarbeit derhinger steckt, wo die ganzi familie mitwuerkt. wo dr padi de ou no het ghuufe ris abschlah, hei die iheimische waeuts froeid gha u chlie choenne pouse mache.
in tulamben si mir bim ne 120 meter frack go touche. es si vo de beschte touchgaeng gsi, wo mir jeh gmacht hei. u es isch es spezieus erlaebnis gsi, wenn die einzelne teile no erkennsch und weisch, dass das schiff im 2 te waeutchrieg gsunke isch.
uebere oschte, wo d landschaft starch praegt isch vo de ehemalige voukanusbruech, si mr de wider zreugg i suede gfahr. in nusa dua, wo aui luxusbunker ihres deheime hei, hei mir mit mueh u not bire naette familie e biuigeri ungerkunft gfunge. so fraech wie mir si, hei mir aber vo dene luxusresorts profitiert u hei uesi tuechli vordranne, a de beschte plaez usbreitet. ohni witeres si mir de i die alage inetschaupet u hei die sanitaere alage benuetzt. d indonesier hei das zwar gnau gseh, aber die getroue sech nuet zsaege. lieber laechle si di eifach ah u mir laechle naett zruegg.so louft das hie:-)hie isch d ebbe u fluet ou sehr starch, aber mi cha glich dr ganz tag bade u d straend si wunderschoen u breit.
die letschti wuche hei mir ues in kuta, bzw. seminyak no es schoens bungalow gleischtet. i daem tourischte ort hei mir fuer 6 taeg es surfbraett gmietet u hei jede tag fliessig guebt. dr padi het sech am schluss scho i raecht grossi waeue gwagt, wos ne maengisch heftig ueberschlage het. bali bietet fuer aui surflevels sehr passendi waeue. fuer ds dani isches perfekt gsi, im schum vo de ehemalige riisige waeue dr schwung mitds naeh u d profis finge z.b. a dr kuescht vo ulu watu eine vo de beschte surfspots vor waeut. fuer ues isch das ungloublech, dass sech da oepper i die 5 meter muhre ihnewagt. mir hei dert stunde zuegluegt u hei zyt so richtig vergaesse.
so, das waers gsi vo bali.Fazit: e schoeni insle, wo viu bietet u me mit em roller am meischte cha gseh.
liebi gruess
mr. ketut und ms katut

Bali -Teil 2

hi zaeme
wo schaerers si hei greiset, si mir ds nati go bsueche. ds nati isch e ehemaligi schueukollegin vom paedu, wo uf bali usgwanderet isch. mir hei bi ihre uebernachtet u si het ues paar gheimtipps vo bali choenne zeige. so si mr z.b a ne wuderschoeni chlini bucht gange, wo no ueberhoupt nid touristisch isch. dr sunneungergang hei mir bim bekannte ulu watu taempu gseh, wo vo affe extrem bewohnt wird. innert chuerzui hei mer dert mehreri mau gseh, wie die cheibe affe blitzschnaeu de touris d brueue u ohrepaenk klauet hei u die verboge u mit so richtig schadefroeid kaputt gmacht hei. irgendwie si ues die affe nid so ghuer. feur i die taempualage mues me immer e sarong alege. das isch das violette jupe, wo dr padi anne het. steit ihm no guet, oder ?
am schluss si mir de no a jimbarabn- beach go aesse. dert chasch dr frueschischt u feinscht u biuigscht seafood vo bali aesse. wunderschoen usegstuehlet, diraekt am strand, mit cherzli u musig,...eifach dr hit.
die naechschte tage si mr mit em roller sozaege fasch i jede egge vo bali gfreset. da mir its nuemm zyt hei feur witer ds schribe, hei mr numme afang die erschte foeteli vo ungerwaegs.wie z.b. dr bratansee oder e fischer wo sis glueck versuecht in lovina. mir verspraeche oeich aber, dass mir in bangkok nomau e blog vo bali schribe. mir fluege naemlech am 23.6 uf bangkok zruegg u hei dert no 3 taeg, bevor mir de am 26.6 its flugi stige fuer richtig switzerland.
auso dir liebe, mir hoffe dir verfouget ou no die letschte reisebrichte vo ues.
bis scho ganz gli gli wider.mir froeie ues extrem uf oeich.
beschti gruess us bali.
die 2 scho fasch heireisende:-)

Bali Teil 1

hallo liebi luet
am 25.5.09 hei mir paedus eutere in bali doerfe traeffe. aextra fuer ues hei si 2 wuche ferie buechet u hei die laengi reis i agriff gnoh. mir hei ues riisig gfroeit ueber dae hoech bsuech u hei die taeg mit schaerers sehr gnosse. uf daem waeg:merci nomau viu mau.
chum si mir acho si mir so richtig schwizerisch begruesst wore. uf uesem gmeinsame baukon in hotel shanti in sanur hei mr salami, feini sauberbacheti schoggichuechli(merci nici), ragusa, u no viu meh choenne aesse u natuerlech hei mr derzue g aperoelet.
die naechschte tage si mr zaeme das schoene u viusitige bali go entdecke. a dr weschtkueschte vo bali, wo mir ueses hotel hei gha, isches eher e chlei ruhiger. d straend si ziemlech schmau u zum bade mues me frueh its wasser, da ab em mittag sech ds wasser waeg dr starche ebbe sehr zruegg zieht. im suedoschte vo bali liege die bekannte surferorte. d waeue choeme da meterhoech derhaer, wos fuer surfprofis, aber ou fuer afaenger es aechts paradies isch.da si de ou die tourischteorte. u wos tourischte het, si ou die ufdringleche verchoeifer. niene uf ueser reis hei mr das so schlimm erlaebt wie its hei in bali. mi cha keni 5 meter loufe, scho wirsch vo aune site aghoue ob nid doch es cheteli, es wickutuech, e houzschnitzerei oder irgend e plunder wosch choufe. das isch maengisch aecht astraengend.
weme ou numme chlei its zentrum vo bali fahrt gseht me sofort u ueberau die schoene riisterasse. jedi einzelni stude wird da vo hang i bode ihne gsetzt. u die meischte faeudarbeite waerde ou no mit dr hiuf vo de wasserbueffle erledigt.
witer si mir ou i kunst vo de balinesische taenz igfuehrt worde. aus zueschauer gseht das ganze rituelle showspiu sehr spannend us. die taenz beinhaute gschichte u taenzer sauber faue zum teil irichtig in trance. natuerlech isch aues immer straeng verbunde mit em hinduistische gloube, wo hie uf bali sehr presaent isch. ueberau cha me die schoene taempualage go bsueche.
ir 2 te wuche si mr mit de eutere schaerers wie richtegi travellers mit de ruckseckli umegreiset.ds erschte ziu isch d gili trawangan insle gsi. die sehr chlini insle hei mr mit em velo i 2 stung umrundet gha. hie hei schaerers aendlech mau chlei zyt gha, i ligistueh ds lige u ds relaxe. aber scho 2 tag speter si mr uf d lombok insle. am senggigi beach hei mir ues es wunderbars plaezli igrichtet u heis ues wider einisch meh, la guet gah. dr strand hie isch wunderschoen u ds meer sehr klar mit viune farbige fischli.
dir gseht, mir heis sehr guet gha zaeme u ou viu erlaebt. umso meh isches de chlei hert gsi, die 2 wider la id schwiz la ds reise. aber mir choeme ja scho baud nache. i ganau18 taeg stoeh mir ou am flughafe chlote.
bis denn gniesse mrs its no in bali u frese mit uesem roller im zueg ume.
dis gli
liebschti gruess patrik und vanila