Malaysia: Redang Island

tschau zaeme

mit em bus si mir quer duer ds land gfahre u nach 4 stung vo kuala lumpur in kuantan acho. dert si mir mit em public bus witer uf cherating. das isch es eher verschlafnigs chlises oertli, wos chum tourischte het; ussert wenn monsun- zyt isch, denn tuerme sech d waeue sehr hoech u de choeme d surfer i schare derhaer. aber waehrend ueser zyt isch ds meer spiegu glatt gsui u d strasse eher vo affe benuetzt u so si mir nach 1 nacht witer uf die hammer redang island. (aui foeteli vo daem bricht si dert gmacht worde.) mir si fuer einisch i nes luxus resort gange u heis ues dert la guet gah. ds meer isch sagehaft schoen u suber gsi u es het eim eifach agmacht zum schnorchle u touche. so si mir uesserscht saeute uf em ligistueh glaege u hei stunde im meer verbracht, bis mir fasch schwuemmhuet hei becho. bim touche hei mir e leopard- hai gseh u dr padi het sech wider ungloublech noech haere getrout. u bim schnorchle hei mir de das schoene nemo- foeteli choenne mache. d koraue si waeg der monsun-zyt, wo bis im maerz duret, no nid es o farbig gsi. aber fisch hets i schare.
its goe mir de uf die naechschti insle u de ghoeret dir gli wider vor anda und em sedang.......(HIHI, mir si gloub die einzige wos luschtig finge mit dene naeme)

Malaysia- melaka und kuala lumpur

hallo mitenand

nach dere guete zyt in singapore hei mir glich mau witer muesse. ueses naechschte bsuecherland isch malaysia u mir hei ir handusstadt melaka agfange. die eher chlini u uebersichtlechi stadt eignet sech sehr guet, um bi dene asiatische verhaeutnis chlei dri zcho. so hei mir i de erschte 2 taeg scho vili sache gseh u erlaebt, wo mir vorhaer no nie gseh hei.
z.B die velotaxis hets wi sand am meer u dene ires Motto isch: umso kitschiger gschmueckt u lueter d technomusig isch, desto besser isches.
Am wuchenaend heisi in melaka immer e grosse maerit im chinatown viertu. doert fingsch aus wos git u ds meischte isch extrem guenschtig.aesse chasch problemlos bi jedem strassestang fuer 2 fr.

vo malaka us fahrsch 1 1/2 stung mit em bus u naer bisch in kuala lumpur.die 1,5 milione ihwohner houptstadt isch sehr viusitig u kluft zwuesche modern und autmodisch het ues sehr riesig duenkt. so isches in chinatown eher chaotisch u ziemlech schmudelig und um die gigantische petronas twins isches sehr suber. aber aus i auem gseh isches sehr e interessanti stadt u es paradies fuer aui ichoufsfruende.

so, bis gli wieder u gniesset dr fruehlingsafang.

auerliebschti gruess us malaysia

lung mee und char keow

Singapore

hallo liebi fruende

us geplante 4-5 taeg si in singapore 1 1/2 wuche ufenthaut worde. mir hei ues bi uesne fruende, bir melanie und dominik, so schampar wouh gfueuht, dass mir fasch nuemme hei witer woeue. d melanie het ues duere tag jewils duer d stadt gfuehrt u ues suveraen d sehenswuerdigkeite zeigt. so si mir vor ichoufsstrass orchard road, ueber e botanisch garte, singapore zoo, china town, little india, arab street, .. ueberau haere cho. u d stadt isch wuerklech schoen u sehr, sehr suber. u super organisiert. u mi mues hie no erwaehne, dass die singaporianis nie e schritt ds viu mache. fuer aues gits hie e routraeppe oder me nimmt de ds taxi. aber bi dere schwueu warme hitz hei mr das no choenne nachevouzieh. auso ohni raegeschirm umgwandlet aus sunneschirm heschs hie ar braentende sunne fasch nid usghaute.

dr dominik het nachem schaffe dr padi in sportlecher hinsicht usegforderet. es isch sowit gange, dass am abe jewils indoor ping-pong maetschli uebere aesszimmertisch hei stattgfunge oder das die 2 herre zwuesche de waertvoue vase vor melanie hei tennis gspiut. bim jasse si die 2 maenner aber eis team gsi u bim gschlaechterkampf si d resultat fair u usgliche fuer beidi parteie usgfaue. (zwueschine isch villech minim pschisse worde)je lenger dr abe, desto maskierter si mir am tisch ghoecklet u desto luschtiger isch es worde u de het ds ustricksle ou kei roue meh gspiut.

nach 9 moenet reise hei mir a dominiks geburi es raclett gnosse. das gloubet dir nid wie fein das gsi isch. mit aechdem emmi schwizer chaes u mit richtige zibeli u guerkli. mi lehrt hie im usland ds schwizer aesse so richti schetze u mi fahrt oeppe es umwaegli, numme dass me schnaeu bim schwizer metzger verbi cha u super cervelats u bratwuerscht cha ichoufe,mmmhhhhh. ah u zweifel chips hei mir ou becho u emmi joghurt, schwizer muesli,....mi bechunnt dert eifach aues.

its saege mir nomau ganz haerzleche dank zu uesne super gaschtgaeber u haebet sorg zu oeich.

liebi gruess us asie vor prata und em mutaba:-)

Perth und Rottnest Island

hallo zaeme

die letschte taeg in oustralie hei mir in perth city verbracht. im kings park und im 

botanische garte si mir bi schoenschtem waetter umgschlenderet u hei die wunderschoeni usicht gnosse. perth isch e schnäuläbegi u viusitegi stadt, aber bi dene heisse temperature si mir de doch lieber ads meer zruegg.

am scarborough beach  hei mir de fuer 4 naecht im ne hostel i checket u hei dert vorauem baedelet u gsurfet. waers gloubt, aber mir hei das aute surfboard am schluss no choenne verchoufe.vo dert us hei mir de e tagestour gmacht uf d rottnest island. mit schnorchuequipment im gepäck si mir um die insle gradlet u hei a de schoene buchtli gschnoerchelet.  immerwider het me die zuetrouleche quakkas troffe. eifach knuddlig sie chline rateschwanz- kängeruh.

mou, de ghoere mir ues gli wider

liebi gruess 

colers and woohlwords

Vo perth bis nach shark-bay

hallo zaeme
da mir ca. 1 wuche fruecher aus planet ir region perth si acho, si mir no grad chlei noerdlech gfahre. ueber fremantle, cottesloe-beach, scarborough, mullaloo-beach si mir die erschte tage bis zu de pinnacles. das si die chauchsangsteine, wo stramm naebenenang wie soudate im sang stoeh.bim sunneungergang isch die stimmig dert umbeschriblech schoen worde.ueber geralton si mir de witer bis zum kalbarri nationaupark. dert hei mir das obligatorische tourischtefoeteli gmacht u si its nateurleche steifaenschter ineghoecklet. dae park isch aber scho einzigartig u d gaegend isch fasch numme rot. wenn eifach die floeige nid waere, die maches eim z verleide. waer schomau hie isch gsi weiss vo was mir schribe. es isch unbgloublech, da schwirre dr 100erti vo dene chline bischter ume chopf, its muh, id naseloecher, d ohre,....drum het dr padi churzum sini ougebindig aus muhschutz umgwandlet, so dass aer wenigschtens proteinfrei het choenne rede. 1 tag speter isch das kaengeruh bim shell- beach entstange. dert chasch bis ca. 10 meter toeif abegrabe u du gsehsch nuet usser muescheli. bim eagele bluff, e ussichtspunkt vom shark-bay, hei mir de no hufe haie choenne zueluege, wie si duer ds wasser gschwumme si. dert obe hei mir draeit u si de wider zruegg zum scarborough-beach. dr paedi, mit sim noeie neoprenazug u mit em surfbraett hesch fasch nuemme usem wasser usebracht. unermuedlech isch aer am waeue surfe. u es klapptet scho veiechlei guet. mit em budi, e schueukolleg vo mine eutere wo ir nechi vo perth wohnt, hei mir mit em boot mitdoerfe ufs meer use. u bir e chline insle hei mir autbekannti tier troffe, u gaegesitig hei mir ues koeschtlech amuesiert. letscht fritig, am 6.3.06 hei mir de chlei mit wehmuet ueses geliebte busli abgaeh u its heissts wider ruckseck a ruegge. mir hei mit daem charrli doch 15000 km abgspuehlet u aer het ues zueverlaessig duer oustralie bracht. natuerlech ou numme dank em guete fahrer padi.scho glie fluege mir its uf singapore u mir froeie ues riisig uf dae letscht teil vo uesere reis.
auso, machets guet u haebet sorg.
bis gli robin und hood