Thailand Inseln :Koh Lipe/ Koh Lanta/ Koh Phi Phi

auso, da si mr scho wider.hallo zaeme

mir si sit 1 wuche in thailand uf de verschidene inseli ungerwaegs u gnisse ds bade, ds schnorchle u ds guete thai esse. bis its merke mir gar nuet vo dr monsun-zyt. im gaegeteil, mir hei extrem heiss u villech maengisch oeppe es liechts raegeli i dr nacht.

Koh Lipe:

wie scho erwaehnt im letschte blog si mir vo malaysia diraekt uf koh lipe mit em boot. waeg em thai- noeijahr isch die insle vou gsi mit thais u es isch extrem schwierig gsi, no es bungalow ds becho. mit glueck hei mi

r de doch nid ir haengematte unger freiem himmu muess

e pfuse. das inseli isch ziemlech chli u mi isch i 15 minute drum gloffe. i de letschte monet si dert d hostel u d

reschtaurand wie piuze usem bode gschosse u drum fingt me ussert em ne bankomat

aues uf daem flaeckli.uf uesem schnorchuusflug hei mir naebscht de thais, wo im wasser mir ihrne orange schwuemweschte umetribe si, doch no die bekannte farbige

softkoraue gseh. u zersch mau hei mir dert e riise quaue entdeckt.auso die insle choei mir wuerklech witer empfaehle. goet eifach nid am ne feschttag vo de iheimische..

Koh Lanta:

nach ere 6 stuendige bootstour si mir im ne naechschte paradies glandet. ou hie si aui straend wuerklech sehr schoen u meischtens ou suber. mir hei fuer 9 fr. es super bungalow gfunge bi ere sehr naette u hiufsbereite familie. bi uesem rollertuerli si mr wider um die haubi insle u hei vilie schnapschuess vo de chline winckeli i de doerfli choenne mache. leider isch gaege abe ues dr pnoe platzt u so hei mir uesi route muesse aendere u zur naechschte reparatur-steu fahre. mir si nume froh,si mr nid ufe schnouz gheit.

Koh Phi Phi:
u de si mir no uf die ganz bekannti phi phi insle. sit dr leonardo di caprio dert im fium The beach gspiut het, ueberlouft die insle fasch vo tourischte. mi mues ou mau saege, dass die iheimische nach em tsunami aues wider bigobello ufbue hei u weme nid wuesst, dass die insle betroffe isch gsi, wuerd me gar nuet merke. au abe hei mir dert e wunderschoene sunneungergang gseh, wo kitschiger gar nuemm choennt si.

auso dir gseht, mir choei nid chlage, ues geits wuerklech guet. gruess chang and singah

Malaysia-Lankawi Island

hallo zaeme

die letschti station vo malaysia isch d insle lankawi gsi, wo ar graenze zu thailand ligt. uf dere insle chasch aues duty-free ichoufe u so hei mr fuer nes bierli grad mau 15 rp. zaut. mir heis zum ne luschtige zytpunkt breicht, da a daem wuchenaend ds wassersport-festival het stattgfunge. dr strand isch uebervou gsi mit lokale luet u ueberau hei si gspiut, gmaetschlet u glachet. mir si daem tribe chlei go zueluege. am naechschte tag hei mir aber de e roller gmietet u si um d insle boerret. mir hei wunderschoeni straendli entdeckt u immer wieder es baedli zwickt. ungerwaegs si mir vilne affebande begaegnet. nid aui si so fruendlech gsi wie die gruppe uf dene foeteli. einigi hei ues fuchend u zaehenezeigend agriffe u mir si sofort abgfreset. wo mr duere dschungu gfahre si, hei mr sogar no e 2ti affesorte entdeckt, die hei sech aber nid so gaern la foetele.

vo lankawi us si mr diraekt mit em boot uf thailand gfahre. auso mi mues da no erwaehne, dass si ersch 5 minute vor abfahrt hei gmerkt, dass ds boot gar nid funktioniert u drum hei mir stunde a daem hafe gwartet...Hihi

guet, de bis gli. tschaegg u waegg diga und lima

Malaysia-Cameron Highlands

selamat liebi luet
im momaent si mir grad im hoechland vo malaysia u gniesse die frueschi chuehli luft. mir hei ca. 20 grad u am nami duets meischtens chlei ragene. huet hei mir e tour gmacht, wo ues id faeuder vo de teeplantage gfuehrt het. die haktarewite faeuder gseh super us u schmoecke duets extrem guet. ueberhoupt wird hie viu ahpflanzet u dr bode schient sehr fruchtbar ds si.
morn goe mir aber scho wider witer richtig meer u plane langsam, fuer uf thailand witer ds reise.
teeschmockerligruessli vo gua und mesang

Malaysia-Jelawang Jungel

Gugus us em raegewaeud
am 5.30 isch ues der BOB, uese privat guid in kota bharu cho abhohle u mir si mit em fuerchterlech stinkende disu-dschungu-zug nach dabong gfahre. dert hei mir die grosse ruckseck im ne guesthouse choenne deponiere u si mit chlinem gepaeck richtig dschungu gloffe. Entlang vom laengschte wasserfau vo sued-oscht-asie si mir bis zu uesem camp gloffe. der waeg isch teilwis sehr verwachse gsi u mir hei ues mit em maesser muesse duereschlah. d hitz het eim fasch erschlage u so si mir froh gsi, hei mir zwueschine i die naturpools choenne go bade. ds camp isch am ne wunderschoene ussichtspunkt glaege, wo mr wiit uebere dschungu het choenne luege. auso wenn de luxus suechsch mit em ne guete bed, gueter chuchi u wc u keni mugge, de bisch hie definitiv faeuh am platz;-) drfuer bisch umgaeh vo viune tier u es isch natur pur. u dae waud isch so bewachse u so verschlinget, das isch eifach dr wahnsinn. am morge hei ues aube d gibbon-affe mit ihrem gschrei gweckt, aber ds gseh hei si sech nie gaeh. ueberhoupt isch es extrem schwirig tier choenne ds beobachte, so hei mir leider vo de elefante u tigere numme fuessabdrueck u schisse gfunge. gaesse hei mir meischtens fruesche fisch, wo d maenner bim speerfische verwuetscht hei. dueschele, zaehnputze u abwaesche hei mir im wassefau, bzw. i de pools erlediget. insgesammt si mir 3 taeg im dschungu umegirrt u hei vo uesem guid viu glehrt. es isch e super zyt gsi u es het gfaegt, widermau back to basic dsi. so, dir gseht, ues geits guet u malaysia gfaut ues wuerklech sehr guet.
ufiderluege tarzan und jane

Malaysia-Perhentian Island

Hi again
vom 29.3-am 2.4.09 si mir uf dr small perhentian island gsi. die erschti nacht hei mir im chline petani beach hostel verbracht. ueses bungalow isch diraekt am einsame u ruhige straendli gsi. bim husriff hei mir bim schnorchle innert 5 minute ca. 20 schwarzspitzhaie um ues kreisend gha. zum glueck hei die nid gaern schwizerfleisch....die naechschte 3 naecht hei mir im brandnoeie shari-la hotel verbracht. das isch am coral-bay u dert isch de chlei meh gloffe u hets meh touris ume gha. spontan hei mir ues entschlosse ae naechschte touchkurs ds mache u so si mir its advanced diver. dr night-dive isch es spezieus erlaebnis gsi u mir hei au die nachtaktive tier choenne beobachte u mau ou gseh, wie d fische schlafe.
auso, bis bau wider. liebi gruess dilarang und merokok