Granada

Hei zaeme
sit lengerer zyt simer in nicaragua. Costa rica haet ues zwar ou guet gfaue, aber es isch mitlerwile scho so touristisch, dass mer lieber chlei meh zyt i de naechschte laender verbringe.
d landschaft vo nicaragua isch wunderschoen u d luet si sehr zfride u fruendlech, obwou si nid viu gaeud hei u die meischte sehr eifach laebe. mir si de grad i die bekannti spaneschi koloniausatdt granada gange u hei dert 4 wuderbari taeg verbracht. d gebaeude si sehr guet erhaute u mit dene verschidene farbe, gits deam ganze vorauem bim sunneungergang nommau e bsungere akzaent.vo dert us heimer de e usflug gmacht ane lagune, wo chlei aehnlch het usgseh wie der bielersee. es isch eim grad warm worde ums haerz. sit dere stadt simer its ds 5 ungerwaegs. der welsch het no 2 flotti israelinne ufgablet. foeteli gits de im naeschte blog:-)
leider isch ds waetter sehr waechsuhaft. fasch jede tag reagnets minimum einisch, aber ds klima isch glich warm. drum simer chlei igschraenkt i de tagesusflueg u muesse ues immer chlei am waetter apasse. aber es macht nuet, wes nid immer so louft wie mes planet.

auso, machets guet u bis gli

dani u paedu

Costa Rica

Parismina

Mir si in Costa Rica fuer 4 taeg i ds 500 Seeledorf Parismina. Dert heimer aus volonteer fuere schutz vode meeresschiudchroet gschaffet, wo ide letschte 28 jahr 95% si usgrottet worde. i 3ne naecht heimer je 4 stung am strand patroulliert. mir hei beobachtet, wie die 1.5 meter grosse schiudchroet si a strand cho(derbi heisi riise trackdorspure hingerlah) u si bim 2 stuendige prozaess vo der eierablag hutnaech der bi gsi. si pudlet es bis zu 85 cm toeifs loch u leit dertri ca 125-130 eier. waehrend der eierablag isch si in trance u genau denn chame aues mit ihre mache:groessi usmaesse, e neui marke drahdue, uf chrankheite teschte, und deier isammle.das isch leider noetig, woeu ufem schwarzmarkt d eier u ds fleisch, sowie panzer sehr beliebt si u verchouft wird. mir hei de die vile ping-pongbau grosse eier am ne angere ort wider vergrabe u uesi spure verwuescht, dass se diebe nid finge.ir nacht darf me numme mit rotliecht schaffe, woeu d schiudchroet keni farbe gseh. mir hei leider ou kenni foeteli ir nacht doerfe mache, woeu si schuesch beiflusst waerde. aber mir choei euch saege, es isch es einmaligs u sehr idruecklechs erlaebnis gsi.am tag simer de die naeschter go kontrolliere u d standaert neu usmaesse.leider hei ou dhueng hunger gha u bi viune naeschter d eier usbuddlet u gfraesse. wenn aues guet louft choemme nach 60 taeg die junge use. vo 1000 chline schiudchroetli wird ca. 1 so aut, dass es ou mau eier leit.
waehrend dere zyt heimer bi ere alleistehende mueter mit 3ne giele glaebt. ds hus isch sehr eifach igrichtet gsi u es het wuerklech numme znoetigschte gha. d familie isch sehr haerzlech u gaschtfruendlech gsi.
das dorf isch numme ueber ne fluss erreichbar, wo sech ou vili gfaehrlechi tier dinne u am ufer ufhaute. zum bispiu ds krokodiu(isch ds einzige woni bis its ha gseh wo ds groessere muh aus der paedu het:-) oder dae chli rot giftig froesch. ou d mugge si hie widermau sehr aktiv gsi.

Cahuita

obwou mir beidi nid choei ritte, heimer glich beschlosse,am strand entlang ds gallopiert. zue gaeh, mir hei ja das ross no nach 3 stung nid beherrscht. mir si froh gsi, womer uesi wunde fuedli wider hei choenne obenabe naeh. am naechschte tag simer richtegi chrueppeli gsi, u so 4 stung duere nationalpark gloffe. dertr heimer hufe affe gseh u ghoere moege.e schlange het ono hallo gseit.
mir saege its tschuess u machets guet
trix u gaex tschou zaeme

Ungerwaegs in Panama

Bocas del Toro
Sit 10 Taeg simer mit em Arnoud, (der Welsch von Genf) in Panama ungerwaegs.Das trio funktioniert sehr guet.Its simer grad uf der insle Colon in Bocas del Toro. Das isch grad bir Graenze zu costa rica, im karibische meer, u isch die Partyinsle schlechthin. aber ou d straend si wunderschoen. mir hei velo gmietet u si 1 1/2 stung ueber d insle gfahr, zum ne wunderschoene strand. leider simer nid so vorwaerts cho, da d choeti vom paedus velo au 100 meter isch usegheit. ueberhoupt isches mit daem eigaenger e chranpf gsi zum tschaupe.bim zruegg gah isches so unmueglech worde mit dere chetti, dass mer ds velo ufenes outo hei muesse uflade u dr paedu jogget isch(i de flipflop 13 km) hihi, u di chline mueggeli(nid malaria) hei zyt gha zum staeche. dr paedu het am einte fuess 69 stiche u am anger laepischi 50.


Boquete
Isch es Doerfli im feschtland vo Panama. es isch bekannt fuer dr kafi, die warme natuerleche Queue, u natuerlech dr Voukan Baru, wo der hoechscht punkt isch vo panama. das heimer ues nid woue la entgah u sie uf dae voukan ufekragslet. leider isch ds taxi nid wie abgmacht am 03.00 ir nacht cho fuer ues zum parkitritt ds bringe. drum heimer zuesaetzlech zu de 1240 hoehemeter nomau 1000 hoehemeter muesse mache.laeckbeck, 12 stung gwanderet, gsammthaft 38 km zrueggleit u 2240 hoehemeter.uesi fuess si am aendi gsi. aber es het sech glohnt, der usblick u der sunneufgang isch gigantisch gsi. vo dert us het me uf ds karibische u pazifische meer gseh.


Santa Catalina
isch es wunderschoens chlises doerfli am pazifik. das surferparadis vo zentreuamerika. drum heimer doch dert ou es braet gmietet u versuecht, die waeue dsverwuetsche. es isch so richtig guet gsi fuer afaenger, woeus kei steine im meer het gha u dwaeue relativ geabigi hoechi.es isch erstundlech guet gange, ou mit emne shortboard. mir wei uf au faeu am bau blibe:-)
ok, morn goemer witer uf costa rica u mache mau der erscht tip vom saendu u rebi.(Saendu u Rebi: merci viu mau fuer die schlafseck, die si praktisch wienemore)
Gruess u Kuss Ç

Panama- City

Vor und nach de Insle San Blas simer in Panama- City gsi. Es isch no relativ schwierig, sich z raechtfinge und ds orientiere, aber d luet si sehr hiufsbereit. i dere stadt hets ueberau bewachti zonene, u die wo kei kamera hei, die soett me miede. fuer ueberau haere cha me die schoen bemauene farbige busse naeh, wo roehre wienemore, aber derfuer nur 25 cents choschte. mit dene heimer ou die diverse usflueg gmacht: ines museum wosie die verschidene kulture zeigt hei, a panama- kanau, u i botanisch garte. dr panama- kanau isch sehr interessant gsi zum luege was da fuer riise frachte vom pazifik zum atlantik transportiert waerde.
mir hei im historische stadtteil ueses chaotische hostel gha. i daem stadtteil gsehrt me uf chlinem rum sehr viu auti gebaeude. wunderschoen.i dere stadt simer immerwider ad heimat erinneret woede, woeu ds baernerwappe ueberau ds gseh isch. die firma, wod hochhueser konstruiert het naemlech ds logo vo baern.ç
bis gli, dan u peter- pan

Panama-Islas san blas

Nachdeam das mer vo mehrere luet ghoert hei, dass die insle sehr schoen si, heimer ues entschide, derthaere zgha. es isch e 4stuendigi houperfahrt gsi, das choeit ihr oich gar nid vorsteue. duer fluess duere u zum teil mit fasch unmuegleche stigige u neigige dinne.aber es het sech meh aus glohnt.

die inseli si im karibische meer, ir nechi vo kolumbie. es het gsammthaft ueber 400 chlini trouminseli oder eifach numme sandbaenk mit paumene. einigi insle waerde vo de kuna indios bewohnt. luschtigerwis si d religione verschide uf de diverse inseli. si ghoere zwar zu panama, aber si vor regierig unabhaengig u dahaer het jedi insle si eiget presidaent. uf de houptbewohnte inslene hets schuele u es spitau, wo ds dani ou grad haet choenne afa schaffe. aber dr arbeitswaeg waer de 3 stung schwuemme gsi:-)

mir si uf der insle aguja gsi. mi cha oeppe i 10 minute drumloufe.es het 3 bambusheusli, paume sang und es wunderschoens riff. mir si dert mit 8 angerne tourischte gsi und dere famili, wo dert druffe gwohnt het. die 3 chline meitli hei extrem froeid gha, womer mit ihne hei gspiut u bloed dah. (papa franz, ds chaeubelihaenke isch acho)

2 mau heimer gwuennscht, uf angeri insle z gha u si de mit em boetli gfahre worde.

zum schlaffe heimer haengematte gha, isch auso bequemer gsi, aus mer daenkt hei. numme isches de ir nacht raecht chaut worde.

mir hei saeuber choenne kokosnuess abehole u die fruesch gniesse. je meh kokosnuess si dunge gsi, desto sicherer het me choenne ungerduereloufe. mit haegli u brot heit der paedu de ou gfischet u sogar sis znacht saeuber usezoge.sini paschtleti reuse isch leider abgsoffe u aer het me dermit d fische gfueteret. languschte heimer leider keni verwuetscht, drum heimer se de fruesch vom ne fischer abkouft u vode kunas la choche.

kunafroue hei aui ihri farbige trachte anne mit de saeubergnaeihte monas druffe( die tierbiudli) ade arme und ade bei heisi chraeuelicheteli u duer dnasescheidewand e grosse goudring. daeh duet nach der pupertaet d grossmuetter ihne (wenn ds meitschizur frou wird) ueberhoupt isch denn es grosses fescht, wo ou dmanne de ihri trachte anne hei.

obwou si kei spanisch rede(numme kuna), si si glich zu ues sehr harzlech gsi und me het sech mit haeng u fuess verstaendiget.

auso, its goemer de scho gli der geburischlummertrunk go naeh. haebets guet.

liebi gruess vo susu u krambambali:-)